 |
E' COSA 'E NIENTE
Vurria sentì 'na voce
dint' 'o suonno
ca me dicesse
chello c'aggia fà:
chello ch'è giusto,
chello ch'è sbagliato,
'e ccose brutte
ca m'aggia scurdà.
Vurria pensà ca Dio
me sta guardanno,
ca senza cercà niente,
con amore,
me spiega
pecchè campe, pecchè more,
'ncopp' 'a 'stu munno
che m'ha miso a ffà.
E invece dint' 'o suonno
mai nisciuno
me chiamma figlio
e m'accarezza 'a faccia,
qual è 'o peccato
ancora nun 'o saccio,
addò sta 'o bbene
nunn' 'o saccio dì.
Vurria sentì 'na voce
dint' 'o suonno
ca me dicesse:
'a vita è 'nu suspiro,
'n'affacciata 'e fenesta,
'nu mumento,
ma tu nun ce pensà,
ca è cosa 'e niente!
'O MESE AUSTO
Cuotto d''o sole 'n terra
Margellina,
pane e frittata,
'nu surzillo 'e vino,
c''a meza lenza,
'o cuoppo e 'o furchettone,
ricce, patelle... e 'o core
'e 'nu guaglione.
Austo era 'na risa,
era culore,
era 'nu grande artista,
'nu pittore,
faceva verde 'o mare
e chiare l'onne,
apprufumata l'aria
e d'oro 'e fronne.
'A primma piccerella,
'o primmo ammore,
'na smania nova
ca rigneva 'o core,
pe 'nu fuglietto tutto
ammappuciato
scritto po' primmo e sulo 'nnammurato!
Mò tanta mise Austo
aggio cuntato,
e 'o tiempo,
comme 'o viento,
ha cancellato
l'ammore eterno,
l'unica passione,
durata sulamente
'na stagione.
Rest' 'o ricordo,
resta 'na poesia,
'na smania ch' è
rimpianto, è nustalgia.
Perciò d'Austo
chistu scemo 'e core
se veste 'a giuvinotto...
e sonna ancora.
Caro Gennaro, scusa 'a cunferènza,
pe Napule 'a può fà 'na preferenza,
tant'anne 'e devuzione e fedeltà
'nce danno stu deritto, nè Gennà!
Stu popolo scugnizzo e pensatore,
primma t'ha fatto pate e prutettore,
po' s'è pigliato 'o dito nziem''a mano
dannete 'o core 'e nu napulitano.
Chi te dimanna 'a grazia pe nu figlio,
chi vene dint''o Duomo, pe cunsiglio,
chi cerca 'e te fà fesso e, aret''e spalle,
te chiamme delinquente e "faccia gialla".
E allora, faccia gialla, nun fà 'o fesso,
nun dicere ca 'o munno è sempe 'o stesso,
fallo capì ca tu staje 'ntussecato,
pe’ mezzo ca stu popolo è cagnato!
Tu sciuoglie 'o sanghe, comme fosse niente,
miette 'a speranza dint''o core 'a gente,
e chi nun vo' capì ca stà sbaglianno
dice che pure tu te staje adeguanno.
Ma mo' fà l'ommo, miettete 'o cazone,
chiava mazzate, fà 'a rivoluzione,
nunn'essere fifone e indifferente,
aiuta 'e buone e caccia 'e malamente!
'O sanghe nunn'o sciogliere, Gennà,
lassala senza pate, 'sta città.
Comme fernesce ancora nunn''o saccio
ma, perlomeno, tu t'a salve... 'a faccia.
